قبل أى حديث
إشتياق بخير ولله الحمد هى وأسرتها الكريمة
حصار ودمار وسفك للدماء وقتل للأبرياء وصبر وجلد وعزيمة وإصرار على النصر
رغم الحزن والحصار والجوع والإنكسار
إشتياق الحبيبة
حدثتنى بالأمس ، رقم من فلسطين ، لم اندهش كثيرآ
من معى ؟؟ أنا إشتياق يا إيمان ، أنا بخير الحمد لله وكلنا بخير يا حبيبتى
دموعى تجمدت من شدة الفرح
الحمد لله يا إشتياق الحمد لله إنكم بخير يا حبيبتى الحمد لله
والله يا إيمان أنا باكلمك من البيت ودة رقم بيتى والحمد لله مافى أى دمار حصل بالبيت والحمد لله
طلبت منها تطمنى أكتر وتحكى اللى حصل معاهم
حكت إن البيت من شدة القصف والحصار وكأنه زلزال بيروح بالبيت يمين وشمال
وإنهم كانوا بيسمعوا صوت الصهاينة بيصرخوا من الصواريخ اللى كانت بتخرج من بين دباباتهم وتقصفهم
وإن الصهاينة كانوا بيقتلوا كل شىء بيتحرك حتى الحيوانات القطط والكلاب (أعزكم الله) وحتى الشجر إن إتحرك بيقصفوة
حكت إن الصهاينة بيدخلوا البيوت ويقتلوا كل اللى فيها ، يفصلوا بين الشباب والنساء
يقتلوا شاب ويسيبوا شاب ويسألوهم تحب أقتلك إنت الأول ولا أقتل أخوك ؟؟
يرد أقتلنى أنا وأترك أخى ، يروح الصهيونى قاتل واحد ويعمل للتانى عاهة مستديمة ، بتر للأطراف أو خرق للعين أو يرحمة ويشنقة
أما النساء ، فقالت إن الصهاينة مش بيغتصبوا البنات ولا النساء
قلت طيب خير ، لكن أكملت حديثها وقالت
بيحضروا مواد كيماوية ويحفضوا بيها الفتاة ويضعوها بمكان عفتها ويتركوها حتى تتعذب وتموت
بيشنقوا النساء والرجال ويقطعوا أطرافهم ويقصفوا صواريخ على الأطفال لو بتلعب فوق سطح البيت
بيمنعوا المساعدات إنها تدخلهم ويقتلوا المسعفين لو فكروا يقربوا من أى مكان به قصف وجرحى أو حتى أى جثث لشهدائهم
مفيش غاز ولا كهرباء من أول يوم تم فيه القصف
مفيش بالتالى أى طعام ولا مكان يحفظوا فيه الطعام إذا حصلوا عليه لأن مفيش كهرباء وبالتالى الثلاجات ولا قيمة لها ، لا خبز ولا طحين ولا مياة صالحة للشرب
دمار فى دمار وحصار فى حصار وكرب
قالت لى صديقتى وحبيبتى إشتياق
كلمت ربنا وناجيتة ، يا رب إنت بتلبى دعوة المظلوم لأنها بتهز عرشك
يا رب إحنا بنهز عرشك وبنقولك إرحمنا وأغيثنا وأعف عنا وفك كربنا ودمر الصهاينة واجعل تدبيرهم فى تدميرهم يا أرحم الراحمين
قالت أنا إحنا مش خايفين من الموت اللى بننتظرة فى كل لحظة ، قالت لى كيف أخاف وأنا لى رب زى ربنا
ربنا دة رحمن رحيم وأكيد إبتلانا لأنه بيحبنا وهو القادر على نصرنا إنه يبعت لنا جندة فى الأرض تحارب معنا
والله يا إشتياق هو أرسل لكم جنودة اللى فى السماء تحارب مع المقاومة
لأن العرب المسلمين اللى فى الأرض كلهم تحت الحصار
********
رسالة إشتياق لكم جميعآ
أنا بخير وكل أهلى
أشكركم وأشكر كل من سأل عنا وكل من بكى من أجلنا وكل من هتف بإسم غزة ورفع علمنا ولبس كوفيتنا وكل من دعا الله لنا ، فهذا دعائكم ونصر الله الذى أرسل جندآ من عندة حاربت وقاتلت معنا ومن أجلنا
شكرآ لكم
وكذلك تبلغكم انها في غاية الشوق للتواصل معكم لولا انقطاع التيار الكهربائي
نتمنى من الله العلي القدير ان تتمكن من التواصل معنا قريبا
********
ورسالتى لأختى وصديقتى الحبيبة إشتياق
أسفة لأنى خذلتك
أسفة لأنى عربية ومسلمة فقط فى أوراقى الرسمية
أسفة إنى بكيت وتقطعت وتألمت وأنا أترحم على الأطفال والخنساوات والشهداء وأنا لا أملك إلا الدعاء لهم
لكن عذرى الوحيد يا صديقتى أننى أنا أيضآ فى حصار
وكلنا فى حصار
20 يناير, 2009 06:09 م